అరుదైన వ్యాధి.. ప్రియుడి గొంతు వినలేకపోతున్న యువతి!

చైనాలోని జియామెన్ నగరంలో ఓ యువతికి విచిత్రమైన అనుభవం ఎదురైంది. ఒకరోజు ఉదయం నిద్రలేచి చూసేసరికి, ఆమెకు తన ప్రియుడి గొంతు వినిపించడం పూర్తిగా ఆగిపోయింది. ఇది వారి మధ్య వచ్చిన గొడవ వల్ల కాదు, ‘రివర్స్ స్లోప్ హియరింగ్ లాస్’ అనే అరుదైన వైద్య పరిస్థితి కారణమని తేలింది. ఈ వ్యాధి సోకిన వారిలో తక్కువ ఫ్రీక్వెన్సీ ఉన్న శబ్దాలను వినే సామర్థ్యం దెబ్బతింటుంది. సాధారణంగా మగవారి గొంతులు తక్కువ ఫ్రీక్వెన్సీ పరిధిలోనే ఉండటంతో ఆమెకు ఆ స్వరం వినిపించకుండా పోయింది. అయితే, ఎక్కువ ఫ్రీక్వెన్సీ ఉన్న శబ్దాలు, అంటే మహిళల గొంతులు వంటివి మాత్రం ఆమె స్పష్టంగానే వినగలుగుతోంది.

ఫోర్బ్స్ కథనం ప్రకారం ఈ వ్యాధికి ఆ పేరు రావడం వెనుక కూడా ఒక ప్రత్యేకత ఉంది. చెవుల వినికిడి శక్తిని పరీక్షించేటప్పుడు వైద్యులు ‘ఆడియోగ్రామ్’ అనే చార్ట్‌ను ఉపయోగిస్తారు. సాధారణ వినికిడి లోపంలో ఈ చార్ట్‌లోని గీత కిందికి వాలుగా ఉంటుంది, ఇది ఎక్కువ ఫ్రీక్వెన్సీ శబ్దాలను కోల్పోవడాన్ని సూచిస్తుంది. కానీ ఈ వ్యాధిలో ఆ గీత వ్యతిరేక దిశలో, అంటే పైకి వాలుగా నమోదవుతుంది. అందుకే దీనిని ‘రివర్స్ స్లోప్ హియరింగ్ లాస్’ అని పిలుస్తారు.

ఈ సమస్య కేవలం మగవారి గొంతుకే పరిమితం కాదు. లోతైన స్వరంతో మాట్లాడే మహిళల గొంతులు కూడా వినిపించకపోవచ్చు. అదే సమయంలో కాస్త ఎక్కువ పిచ్‌లో మాట్లాడే మగవారి గొంతులు స్పష్టంగా వినిపించే అవకాశం ఉంది. అంతేగాక‌ ఉరుము శబ్దం, కొన్ని సంగీత వాయిద్యాల నుంచి వచ్చే లోతైన శబ్దాలు వంటివి కూడా వీరికి వినిపించవు.

ఈ వ్యాధిని గుర్తించడం చాలా కష్టమని నిపుణులు చెబుతున్నారు. ఎందుకంటే సాధారణంగా కీచుమని వినిపించే పదునైన శబ్దాలు వినపడకపోతే ప్రజలు వెంటనే గుర్తిస్తారు, కానీ నెమ్మదిగా, లోతైన శబ్దాలు వినిపించకపోవడాన్ని అంత త్వరగా గమనించరు. దీనివల్ల చాలామంది ఏళ్ల తరబడి తమకు ఈ సమస్య ఉందని తెలుసుకోలేకపోతారు. మెనియర్స్ వ్యాధి, వైరల్ ఇన్ఫెక్షన్లు, కిడ్నీ వైఫల్యం, మెదడు చుట్టూ ఒత్తిడిలో మార్పులు వంటివి ఈ పరిస్థితికి దారితీయవచ్చని వైద్యులు తెలిపారు. ఒకవేళ వినికిడి శక్తి శాశ్వతంగా దెబ్బతింటే, హియరింగ్ ఎయిడ్స్ వాడటం ద్వారా ఉపశమనం పొందవచ్చు. ఇక, ఆ మహిళ ప్రియుడి విషయంలో ఇది వ్యక్తిగతంగా తీసుకోవాల్సిన అవసరం లేదని వైద్యులు సరదాగా చెప్పినట్లు ఫోర్బ్స్ తన కథనంలో పేర్కొంది.